Landsliðsstyrkur fyrir haust 2018 afhentur í Borgarholtsskóla

Miðvikudaginn 9. janúar var landsliðsstyrkur afreksíþróttasviðs afhentur

Frá 9. afhendingu landsliðsstyrks afreksíþróttasviðs Borgarholtsskóla fyrir haust 2018. Efri röð frá vinstri; Ásta aðstoðarskólameistari, Jónína, Þorleifur, Goði, Hafsteinn Óli, Arnar  (handbolti), Brynjólfur (sund), Þórður (karate), Kristófer og Dagbjartur (golf) og Sveinn verkefnisstjóri. Neðri röð frá vinstri; Sigvaldi (blak), Arnór (handbolti) Bergrún (frjálsar), Þórunn (borðtennis), Ragna (sund), Helga (frjálsar) og Axel (handbolti). Á myndina vantar Magnús Gauta (borðtennis).

Þau voru mörg og fjölbreytt verkefnin sem landsliðsfólkið okkar tók þátt í fyrir áramót. Hér erum við með yfirlit þeirra verkefna frá því fyrir áramót.

Sigvaldi í stólnum til hægri

Sigvaldi Örn blakmaður úr Aftureldingu var tvívegis valinn í landslið Íslands í blaki árið 2018. Hann var valinn í U-19 landsliðið sem tók þátt í NEVZA 2018 í Færeyjum í mars og í U-17 landsliðið sem tók þátt í NEVZA U-17 liða í Danmörku í október.

Magnús á vinstri hönd

Magnús Gauti borðtennismaður ársins 2018 hjá sínu sérsambandi tók þátt í Evrópumóti fullorðinna í Alicante dagana 18 – 23. september. Mótið var afskaplega erfitt segir Magnús en víst að þarna hefur hann nælt sér í góða reynslu enda ungur að árum.

Þórunn lengst til vinstri

Þórunn Ásta borðtenniskona fór til Eistlands með unglingalandsliðinu að keppa við stöllur sínar af Norðurlöndunum síðasta sumar og er reynslunni ríkari eftir þá ferð.

Bergrún Ósk íþróttakona fatlaðra keppti  á Evrópumeistaramóti fatlaðra í Berlín. Þar tók hún þátt í fjórum greinum 400m (4. sæti), 200m (3ja sæti), 100m (3ja sæti) og langstökki (2. sæti) ásamt því að bæta persónulegan árangur í öllum greinunum. 

Helga hér til hægri

Helga Þóra var valin til að taka þátt á Norðurlandamótinu U20 í Danmörku í Hvidovre þar sem hún tók þátt í  hástökkskeppni fyrir hönd Íslands og Danmerkur (sameiginlegt lið) og stökk hún 1,66 metra sem er aðeins frá hennar besta sem er 1,74m og endaði í 6. sæti.

Dagbjartur kylfingur keppti með landsliðsliði pilta á síðasta ári og vann það sér rétt til þátttöku í A- deild  með árangri sínum. Dagbjartur hefur verið mjög duglegur að taka keppa undanfarið ár og hefur það gengið mjög vel og hann er m.a.  Íslandsmeistari í sínum aldursflokki 2 ár í röð og Klúbbmeistari GR.

Kristófer Karl golfari keppti fyrir Íslands hönd á EM í Búdapest. Þar tók hann átt í liðakeppni þar sem þeir drengir lönduðu 3. sæti og komust upp í aðra deild.

Hafsteinn Óli í efri röð fyrir miðju nr. 10, Þorleifur 4. frá hægri í efri röð. Neðri röð frá hægri, Arnór Snær, Goði Ingvar og Arnar Máni.

Hafsteinn Óli, Goði Ingvar, Arnar Máni, Arnór Snær og Þorleifur Rafn handboltamenn tóku þátt með U18 ára landsliði Íslands á EM í Króatíu síðasta haust. Þar var árangurinn hreint út sagt frábær og hafnaði liðið í 2. sæti.

Axel neðst til vinstri

Axel Hreinn ásamt fleirum af afrekssviðinu keppti með U18 á Sparkassen móti með handboltalandsliðinu milli jóla og nýárs. Liðið hafnaði í 3ja sæti eftir gott mót.

Benedikt lengst til vinstri

Benedikt Gunnar keppti á æfingamóti með U-17 ára landsliði í handbolta. Leikið var í Lille í Frakklandi 24. – 28. október sl.. Liðin sem tóku þátt voru auk Íslands, Frakkland, Króatía og Sviss. Liðið vann einn leik, gerði eitt jafntefli og tapaði einum.

Þórður Jökull karate maður keppti á tveim alþjóðlegum mótum með landsliði Íslands nú í haust. Í byrjun september keppti hann á Finnish Open Cup í Helsinki í tveim flokkum, í kata junior og í kata senior. Í lok nóvember keppti hann á Norðurlandameistaramótinu í karate í kata junior og hópkata karla (male team kata).

Jónína nr. 18 í efri röð

Jónína  Hlín handboltakona fór ásamt U18 ára landsliði kvenna til Púchov í Slóvakíu. Þar kepptu þær þrjá vináttulandsleiki við Slóvakíu. Þær töpuðu fyrstu tveimur leikjunum en sigruðu seinasta leikinn.

Brynjólfur Óli sundmaður fór fyrst til Argentínu að keppa á Youth Olympic Games sem var haldið í Buenos Aires í október. Þar keppti hann í 50 og 200m baksundi. Þá keppti hann á Norðurlandameistaramótinu sem var haldið í Finnlandi í 50, 100 og 200m baksundi, og komst inn í úrslit og bætti sig í 100 og 200 baki.

Ragna í neðri röð, fjórða frá hægri

Ragna Sigríður sundkona fór á Norðurlandameistaramótið sem fór fram í Oulu í Finnlandi þar sem henni gekk vel og komst hún í úrslit með persónulegum bætingum.

Til hamingju öll – og haldið áfram þessu góða striki!

Sveinn Þorgeirsson, verkefnisstjóri

Bergrún kom, sá, og sópaði að sér verðlaunum!

Haustið hefur farið kröftuglega af stað hjá okkar nemendum. Einn nemandi sem hefur verið að gera frábæra hluti er hún Bergrún Ósk. Hún keppti nýverið á Evrópumeistaramóti í Berlín og stóð sig hreint frábærlega. Svo vel að hún fékk góða umfjöllun í fréttum RÚV (sjá hér að neðan) Virkilega vel gert Bergrún!

Hér má sjá innslag með viðtali við Bergrúnu í fréttum RÚV.

http://www.ruv.is/frett/bergrun-osk-med-silfur-jon-margeir-i-7-saeti

Hér er svo önnur frétt frá því þegar Bergrún tryggði sér brons í 200m spretti í flokki T37, flokki hreyfihamlaðra.

http://www.ruv.is/frett/frabaer-endasprettur-tryggdi-bergrunu-brons

með kærri kveðju,

Sveinn og þjálfarar afreksíþróttasviðs

 

Enn styrkist aðstaðan fyrir nemendur

Þann 8. ágúst nk. verður fjölnotaíþróttahús við Egilshöllina afhent til notkunar fyrir Fjölni, Borgarholtsskóla og aðra leigjendur. Þetta er okkur gríðarlega mikið fagnaðarefni enda verður góð aðstaða okkar enn betri með aðgengi að þessari frábæru aðstöðu.

Þessi salur hefur lengið verið í umræðunni, en eftir að ákvörðun var tekin og vinnuvélar mættu á svæðið gerðust hlutirnir hratt. Framkvæmdin hefur tekið tæpt ár frá því þær hófst, seint síðasta haust í fyrra.

Mynd frá framkvæmdum í sumar. Hér átti m.a. eftir að parketleggja og setja inn mörk og körfur.

Í vetur koma nemendur í handbolta og körfubolta til með að æfa í fjölnotasalnum ásamt mögulega fleiri greinum í framtíðinni. Þessar greinar bætast því í hóp fótbolta, styrkþjálfunar, frálsíþrótta, borðtennis, keilu og íshokkí sem áður hafa verið kenndar í Egilshöllinni. Í dag er það því aðeins golfíþróttin sem sækir aðstöðu utan veggja hallarinnar, en þó hefur golfið verið á grasinu öðru hverju undanfarin misseri.

Það er því óhætt að segja að tilhlökkunin fyrir nýja salnum og starfi vetrarins sé farin að byggjast upp hjá þjálfurum og vonandi nemendum sviðsins líka.

Með bestu kveðju,

Verkefnisstjóri SÞ

Landsliðsstyrkur fyrir vor 2018

Landsliðsstyrkur afreksíþróttasviðs var veittur nú fyrir helgi og þáðu 17 nemendur styrk. Eins og svo oft áður eru verkefnin fjölbreytt eins og greinarnar sem nemendur koma úr og hér er stutt samantekt.

Arnór Snær, Arnar Máni, Daníel Freyr, Viktor Gísli og Hafsteinn Óli kepptu með U18 ára handboltalandsliðinu og sigruðu Sparkassen mótið í Þýskalandi.

Bergrún Ósk keppti fyrir hönd Íþróttafélags fatlaðra á Ítalíu í 100, 200 og 400m hlaupi ásamt langstökki.

Brynjólfur Óli var á Tenerife með sundlandsliðinu í verkefni sem er liður í undirbúningi fyrir Summer Youth Olympics í október í Argentínu.

Daníel Sverrir Guðbjörnsson ásamt dansfélaga sínum urðu Austur-Bandaríkjameistarar 2018 og eru sem stendur í 13. sæti í Evrópu yfir sterkustu pörin.

Jóhann Árni og Valgeir Lunddal kepptu í milliriðli fyrir undankeppni Evrópumóts U17 í fótbolta. Þar spiluðu þeir við stórþjóðir í fótboltanum, Holland, Ítalíu og Tyrkland, en máttu sætta sig við tap að þessu sinni.

Viktor Andri og Ómar Castaldo  tóku þátt í æfingamóti á vegum U17 ára landsliðsins í fótbolta í Hvíta-Rússlandi þar sem 4 sigrar unnust og 1 tap var staðreyndin.

Ellert Kristján og Magnús Gauti eru úti í Grænlandi þegar þessi frétt er skrifuð að keppa í borðtennis fyrir Íslands hönd.

Jón Albert keppti í Króatíu með U18 ára landsliði Íslands í íshokkí. Leikið var á Heimsmeistaramóti 2. deild B og töpuðu Jón og félagar öllum sínum leikjum því miður.

Steindór Máni keppti með U20 í keilu í Katar í febrúar og Evrópumóti unglinga í Danmörku þar sem Steindór byrjaði mótið afar vel og endaði í 26. sæti, og rétt missti af þátttökurétt í Masternum sem 24. efstu sætin gáfu.

Frá 8. afhendinglandsliðsstyrks í Borgarholtsskóla 17. maí 2018. Efri röð frá vinstri, Daníel Sverrir, Viktor Gísli, Goði Ingvar, Ómar Castaldo, Arnór Snær, Daníel Freyr, Arnar Máni, Hafsteinn Óli, Viktor Andri og aðstoðarskólameistari Ásta Laufey. Neðri röð frá vinstri; Valgeir Lunddal, Jóhann Árni, Magnús Gauti, Ellert Kristján, Steindór Máni, Brynjólfur Óli, Jón Albert og Sveinn verkefnisstjóri afreksíþróttasviðs. Á myndina vantar Bergrúnu Ósk Aðalsteinsdóttur.

Svona lítur viðurkenningaskjalið út sem nemendur fengu. Til hamingju aftur öll!

með vor-kveðju!

Sveinn og kennarar á afreksíþróttasviði

Landsliðsstyrkur afhentur í 7. sinn

Landsliðsstyrkur afreksíþróttasviðsins var afhentur í 7. sinn mánudaginn 8. janúar sl. Það var og er alltaf góð stund og í þetta skiptið voru það hvorki fleiri né færri en 19 nöfn sem höfðu tekið þátt í verkefnum landsliða á vegum sérsambands á síðustu önn. Það er glæsilegur árangur og hér gefur að líta yfirlit yfir nemendurna og hvað þau voru að fást við.

Frá 7. afhendingu landsliðsstyrks fyrir haust 2017. Efri röð frá vinstri. Sveinn verkefnisstjóri, Bjarni stofnandi sviðsins, Tumi Steinn, Arnar Máni, Hafsteinn Óli, Daníel Freyr, Arnór Snær, Goði Ingvar, Kolbeinn Tómas, Björgvin Franz, Sigurjón Daði og Ásta Laufey aðstoðarskólameistari. Neðri röð frá vinstri: Brynjólfur Óli, Ragna Sigríður, Bryndís, Jón Albert, Magnús Gauti, Ómar Castaldo, Jóhann Árni. Á myndina vantar Þorleif, Andreu og Bergrúnu Ósk.

Verkefnin sem styrkt voru eru eftirtalin:

Ólympíumót æskunnar þar sem handboltaleikmennirnir Tumi, Arnar, Hafsteinn, Daníel, Björgvin, Þorleifur, Arnór og Goði kepptu fyrir Íslandshönd með U18 ára landsliði Íslands og enduðu í 8. sæti. Þess má geta að þeir kepptu einnig á Sparkassen Cup í Þýskalandi og sigruðu, fyrst íslenskra ka. landsliða til að gera það eftir 20 ára þátttöku í mótinu.

Magnús Gauti borðtennisspilari keppti á sterku móti í Finlandi í byrjun árs og sigraði þar tvær viðreignir sem telst góður árangur.

Norðurlandamótið í sundi skartaði 3 nemendum frá okkur. Bryndís Bolladóttir nældi sér í brons og persónulegar bætingar. Brynjólfur keppti og komst í úrslit í 200m baksundi og var 9.  100m baksundi. Ragna Sigríður keppti svo í 200m skriðsundi þar sem hún hafnaði í 9. sæti.

Andrea Jacobsen lék með A-landsliði Íslands í undankeppni EM í handbolta í tapleikjum gegn sterkum liðum Dana og Tékka.

Jón Albert lék með U18 ára íshokkílandsliði karla á HM 2. deild. Þar endaði liði í 5. sæti.

Ómar, Jóhann og Sigurjón kepptu með U17 ára landsliði Íslands í fótbolta í riðlakeppni EM sem fram fór í Finlandi. Drengirnir stóðu sig vel og komust áfram í milliðriðil.

Frjálsíþróttafólkið okkar lét ekki sitt eftir liggja. Kolbeinn Tómas keppti á Norðurlandamóti Unglinga í fjölþrautum. Þar hafnaði hann í 5. sæti í U18 ára flokki. Bergrún Ósk keppti á HM unglinga í Nottwill í Swiss og hafnaði þar í 1., 4. og 6. sæti í keppni í þrautum.

Við óskum nemendum til hamingju með árangurinn og velfarnaðar á íþrótta og skólaárinu 2018!

Sveinn verkefnisstjóri og þjálfarar

Afrekssviðsnemendur með verðlaun í tugþraut 16-17 ára

Tveir af okkar nemendum í einstaklingsíþróttum kepptu á meistaramótinu í fjölþrautum núna um helgina, þar sem þeir höfnuðu í 1. og 3. sæti í tugþraut 16-17 ára. Þetta eru þeir Kolbeinn Tómas Jónsson (2. ár) og Úlfur Árnason (nýnemi) og keppa þeir báðir fyrir hönd ÍR. Við óskum drengjunum til hamingju með árangurinn og gangi þeim vel á mótum vetrarins!

Nánar um mótið hér á vef ÍR um mótið http://ir.is/frjalsar-news/mikid-um-baetingar-a-mi-i-fjolthrautum/

Hér er Kolbeinn fyrir miðju og Úlfurr til hægri. Til hamingju drengir!

Sveinn og Brynjar G

Rannsókn sjúkraþjálfaranema á meiðslum á afreksíþróttasviði

Í vetur starfaði afreksíþróttasviðið með nemendum úr sjúkraþjálfunarskori HÍ undir leiðsögn Árna Árnasonar. Verkefnið var mjög áhugvert, enda hefur ekkert sambærilegt verið gert hér á landi. Hér er að finna ágrip en verkefnið veðrur aðgengilegt á Skemman.is í sumar. Við þökkum stúlkunum fyrir samstarfið og kynninguna á niðurstöðum sem þær héldu fyrir kennara sviðsins nú í vikunni.

Inngangur: Æfingaálag hjá ungu íþróttafólki hefur aukist á síðastliðnum árum. Rannsóknir gefa til kynna að samband sé á milli æfingaálags og meiðslatíðni hjá íþróttafólki. Íþróttameiðsli geta verið stórt vandamál. Þau geta m.a. valdið tímabundinni fjarveru frá íþróttum og jafnvel skóla eða vinnu ásamt því að hafa andleg og félagsleg áhrif. Ekki er mikið til af rannsóknum á íþróttameiðslum barna og unglinga á Íslandi.

Markmið: Kanna meiðslatíðni og æfingaálag hjá ungu íþróttafólki, ásamt því að skoða hvort tengsl séu þar á milli. Skoða hvort munur sé á meiðslatíðni og æfingaálagi á milli kynja annars vegar og íþróttagreina hinsvegar. Kanna hvert hlutfall álagseinkenna og bráðameiðsla er af heildarfjölda íþróttameiðsla.

Aðferðafræði: Tvennskonar spurningalistar voru lagðir fyrir framhaldsskólanemendur á afreksíþróttasviði haustið 2016. Annar þeirra var lagður fyrir nemendur einu sinnu og hinn alls fjórum sinnum yfir 8 vikna tímabil. Gögnum var safnað saman og flutt yfir í Excel og SAS Enterprice Guide 7.1 til úrvinnslu.

Niðurstöður: Marktækt minna æfingaálag og lægra meiðslahlutfall er í fótbolta miðað við handbolta og aðrar íþróttagreinar. Einnig er tíðni álagseinkenna í mjóbaki, hnjám og öðrum líkamshlutum lægri í fótbolta en handbolta á þessum árstíma. Ekki er marktækur munur á æfingaálagi og meiðslatíðni milli kynjanna þrátt fyrir að stúlkurnar hafi í öllum tilvikum haft hærri meiðslatíðni. Auk þess voru stúlkurnar með marktækt fleiri höfuð- og andlitsmeiðsli en drengir ásamt marktækt fleiri meiðsli í neðri útlimum. Álagseinkenni mældust marktækt fleiri en bráðameiðslin, bæði hjá stúlkum og drengjum. Ekki er fylgni milli aukins æfingaálags og hærri meiðslatíðni meðal ungs íþróttafólks.

Ályktanir: Þessi rannsókn var lítil og náði yfir stutt tímabil og það gæti hafa haft áhrif á niðurstöður. Því er þörf á stærri og yfirgripsmeiri rannsókn á þessu sviði hér á landi. Niðurstöður gefa þó innsýn í meiðslatíðni og æfingaálag hjá ungu íþróttafólki í mörgum mismunandi íþróttagreinumi og geta þar með byggt grunn að fyrirbyggjandi aðgerðum.

20 styrkir og aldrei fleiri!

Þann 10. maí fór fram 6. afhending á landsliðsstyrk á afreksíþróttasviðinu. Þeir nemendur sem hafa tekið þátt í landsliðsverkefnum á vegum sérsambands fá 25.000 kr. styrk. Hér er um að ræða nemendur sem keppa fyrir Íslands hönd (ein keppir fyrir BNA) í yngri landsliðum (nokkrir hafa þó keppt fyrir A landslið).

 

Frá 6. afhendingu landsliðsstyrks fyrir vor 2017. Á myndinni eru: Efri röð frá vinstri; Sveinn verkefnisstjóri, Ingi Bogi aðstoðar- og Ársæll skólameistari, Tumi, Arnór, Goði, Vignir, Sara Sif, Arnar Máni, Sara Dögg, Hafsteinn, Sara Margrét, Daníel Freyr og Andrea. Neðri röð, Jón Albert, Sigríður Dröfn, Hjalti, Bryndís og Berglind. Á myndina vantar Elvar Snæ, Maksymilian Jan og Huga Rafn.

Afhendingin var sérlega fjölmenn á þessu vori og hafa aldrei fleiri fengið styrk á einni önn, eða alls 20 nemendur sem hver um sig fékk 25.000 kr. í styrk. Talnaglöggir lesendur sjá að um er að ræða hálfa milljón í styrk! Eftirfarandi nemendur fengu styrk að þessu sinni fyrir verkefni sem tilgreind eru hér að neðan.

  • Sara Dögg Hjaltadóttir og Sara Sif Helgadóttir tóku þátt í undankeppni í Póllandi með U17 ára landsliði kvenna í handbolta.
  • Arnar Máni, Goði Ingvar, Arnór Snær, Tumi Steinn, Daníel Freyr og Hafsteinn Óli tóku allir þátt í verkefni unglingalandsliði karla U17 í Frakklandi í handbolta.
  • Bryndís Bolladóttir sundkona var valin til þátttöku á Smáþjóðaleikunum sem fara fram snemmsumars í San Marínó.
  • Sigríður Dröfn Auðunsdóttir skíðakona keppti í Tyrklandi á Vetrarólympíuhátíð Evrópuæskunnar sem fram fer í Erzurum.
  • Maksymilian Jan, Vignir Freyr Arason, Hugi Rafn Stefánsson og Jón Albert Helgason ferðuðust alla leið til Nýja Sjálands til að keppa í íshokkí með U20 ára landsliði Íslands.
  • Hjalti Jóhannsson og Elvar Snær Ólafsson kepptu fyrir hönd Íslands í Rúmeníu á heimsmeistaramóti í íshokkí.
  • Berlind Benediktsdóttir og Andrea Jacobsen handboltakonur kepptu í undankeppni Evrópumótsins á Spáni í mars.
  • Sara Margrét Brynjarsdóttir tók þátt í verkefni með bandaríska A landsliði kvenna í handbolta í Bandaríkjunum.

Það þarf varla að taka það fram en auðvitað voru þau landi og þjóð til sóma og stóðu sig vel! Óskum þeim áframhaldandi góðs gengis í sumar.

SÞ, verkefninsstjóri

 

5. afhending – og aldrei fleiri fengið styrk!

Mánudaginn 9. janúar fór fram afhending á landsliðsstyrk afreksíþróttasviðs, og var það í 5. sinn sem nemendum er veittur styrkur fyrir ferðum á vegum landsliða. Fyrir haustönn voru margir sem fengu styrk og hópurinn því sérstaklega stór – sem er frábært. Hver nemandi fékk viðurkenningarskjal og 25.000 kr. styrk greiddann.

5. afhending landsliðsstyrks í Borgarholtsskóla. Frá vinstri, efri röð. Ársæll skólameistari, Arnar Máni, Daníel Freyr, Tumi Steinn, Hafsteinn Óli, Jón Bald, Andrea J., Sveinn verkefnisstjóri. Frá hægri neðri röð; Bryndís B., Berglind B., Sara Margrét, Arnór Snær, Hjalti J., Elvar Snær. Á myndina vantar Goða Ingvar, Theu Imani og Arnar Geir.

Verkefni þeirra sem fengu styrk eru eftirfarandi

Arnór Snær og Tumi Steinn (úr Val), Arnar Máni, Daníel Freyr, Jón Bald, Hafsteinn Óli og Goði Ingvar (úr Fjölni) tóku allir þátt í undanleppni HM í Frakklandi með U17 í handbolta.

Bryndís Bolladóttir sundkona tók þátt í Norðurlandameistaramóti í 25 metra laug.

Andrea Jacobsen og Berglind Benediktsdóttir úr Fjölni kepptu með U19 ára landsliði kvenna í handknattleik á Opna Evrópumeistaramótinu í Svíþjóð.

Hjalti Jóhannsson og Elvar Snær Ólafsson kepptu með U20 í íshokkí á HM í Mexíkó.

Þá keppti Arnar Geir Líndal körfuknattleiksmaður úr Fjölni með U16 ára landsliðinu í körfubolta.

Thea Imani úr Fylki tók þátt í verkefni með A landsliðinu í handknattleik og Sara Margrét  úr Fjölni fór til USA til móts við A-landsliðs Bandaríkjanna í handknattleik.

Óskum þessu flotta afreksfólki til hamingju með árangurinn og einnig að þau haldi áfram að standa sig svona vel.

Sveinn Þorgeirsson